Proyekto sa Sibonga gisubhan

CEBU, Philippines - Gisubhan ni Governor Gwendolyn Garcia ang tulo ka mga proyektong inprastraktura nga gibanabana nga mobalor og P2.4 milyones   sa lungsod sa Sibonga sa miaging adlaw.

Ang maong mga proyekto naglakip sa senior citzen building nga nagkantidad og P800 mil, public restroom, ug ang heritage park. Si Angel Coldilla, ang Presidente sa Federation of Senior Citizens sa nahisgutang lungsod mapasalamaton kaayo sa gobernador ug kang Mayor Lionel Bacaltos sa maong lungsod.

Kauban sa gobernador nga misubo sa maong mga proyekto mao sila si 3rd district Cong. Pablo John Garcia, Board member Julian Daan, mayor Bacaltos ug uban pa.

Gipasabot sa gobernador nga ang maong mga proyekto usa usab niya ka pasalamat sa taga Sibonga kinsa mibotar kaniya sa miaging election hinungdan sa pagpabilin niyang gobernador. Hinuon sa sunod election si Cong. PJ Garcia mao nay mangampanya sa taga Sibonga alang sa iyang tinguha nga magpapili pagka-gobernador. (BANAT NEWS)