Agosto 12

1898— Pormal nga nagpinirmahay ang Amerika ug Espanya sa peace protocol nga maoy nahimong sinugdanan sa pagtapos sa Spanish-American War. Apan lakip sa gikasabutan sa mga opisyales sa duha ka nasud dinhi sa Pilipinas nga sila si Admiral George Dewey sa US ug Spanish Governor General Basilio Augustín mao ang paghimo og senaryo nga kunohay naggiyera ang ilang mga pwersa ug mapildi ang Espanya sa mga Amerkano. Kini gumikan sa kabalaka sa Espanya nga kung masakop sa mga 30,000 ka tropa sa Katipunero nga milibot na sa Manila panimaslan unya ang mga residenteng Espanyol. Agosto 13,1898 gisugdan ang ‘drama’ sa US ug Espanya ug nakugang na lang ang mga Katipunero nga dali rang misibog ang Espanya ug mianunsyo ang US nga nasakop na nila ang Pilipinas.

Gilimpyo sa samad kemikal panglimpyo sa kanal

1865— Si Dr. Joseph Lister maoy labing unang surgeon nga mihimo og antiseptic operation pinaagi sa paggamit og carbolic acid. Motuo ba mo nga ang antiseptic nga unang gigamit ni Lister kemikal kadto nga panglimpyo sa mga kanal? Base sa nakat-unan ni Lister sa Louis Pasteur Institute, ang impeksyon makuha tungod sa bacteria. Nakakuha siya og ideya nga posibleng maayong pangontra sa impeksyon ang carbolic acid nga gitawag kaniadto og phenol nga maoy gigamit pagwagtang sa baho sa kanal tungod sa kadaghan sa mga kagaw o bacteria nga naa sa hugaw nga tubig. Ang unang pasyenteng gigamitan ni Lister niini mao ang 12-anyos nga si James Greenlees kansang batiis nabuak human maligsi og karo. Sukad nga gigamit ni Lister ang maong antiseptic matag duna kini operahan mikunhod ang mga namatay sa impeksyon gikan sa 45 porsiyento ngadto na lang sa 15 porsiyento.

Gi-ban sa Olympics

1964— Gi-ban ang nasud sa South Africa nga makaapil sa Olympic Games tungod sa paglapas niini sa tawhanon katungod sa mga itom o negro sa ilang nasud. Ang International Olympics Committee midemanda sa South Africa nga hunongon na ang dili makatarunganong pagtratar sa ilang gobiyerno ngadto sa mga lumad nga South Africans (black Africans). Ang South Africa kaniadto bisan gidominar sa mas dakong populasyon sa Black South Africans nagsunod lang sa polisiya sa mga opisyales nga mga puti. Tungod sa pagmagahi sa South Africa pagtangtang sa Apartheid Policies niini wala sila tuguting makasalmot sa Tokyo Olympics. Nabalik lang sila sa Olympics niadtong 1992, 28 ka tuig human sa suspensyon.

Traffic Education

Kini nga traffic sign ibutang kung dili kaayo makita ang sunod nga kurbada ug lisod matagna ang kasugat nga sakyanan maong giisip kini nga peligroso sa dili magmatngon nga drayber. Kung ang unang kurbada patuo ang right reverse bend traffic sign maoy makita, kung sa wala ang unang kurbada ang left reverse bend maoy nakabutang. TIPS: Kinahanglang mo-menor sa speed paigo nga dili molapas sa kurbada ug mobusina aron makabantay ang kasugat.