Nangawat og pilit gikulata sa mga estambay

CEBU, Philippines - Nabulit sa bun-og ang kalawasan sa usa ka suspetsadong kawatan kinsa misuway og kawat sa tunga sa sakong pilit nga humay gikan sa usa ka tindahan sa merkado publiko sa dakbayan sa Mandaue sa miaging buntag.

Si PO2 Randy Dennis Batistis sa kapolisan sa Presinto 1, sa Mandaue City Police Office miila sa suspetsado nga si Eleuterio Candido Baunsit, 23, ulitawo, nga taga sitio Asinan, barangay Mantuyong, sa maong dakbayan.

Matud pa ni PO2 Batistis nga nasakpan ang suspetsado nga mipas-an sa tunga sa sakong pilit nga humay gikan sa tindahan ni Luke Fare Lao, 36, nga taga Felicitas Village, sa barangay Looc sa maong dakbayan.

Nasayran nga samtang nagpas-an ang suspek sa pilit, nasigpatan kini sa tag-iya sa tindahan busa mitawag kini sa security guard sa merkado apan midagan ang suspek busa gitabangan kini og gukod sa mga estambay hangtud nga nadakpan ug gitabangan kini og kulata busa puwerting bun-oga.

Sa pagkakaron anaa pa kini sa tambalanan diin ihatud sa kapolisan ug nagpaalim pa sa iyang mga bun-og sa kalawasan. - Romeo T. Limpangog ug Nestle L. Semilla, USJR Masscom Intern/WC (BANAT NEWS)