Kawani sa Capitol may housing unit

CEBU, Philippines - Makaangkon na unya og housing unit ang mga empleyado sa Kapitolyo ug sa mga district hospital sa lalawigan sa Sugbo sa may Sugbo Gawad Kalinga Village Housing Project sa barangay Tunghaan lungsod sa Minglanilla.

Kini subay sa tinguha ni Governor Gwendolyn Garcia nga ang mahabilin nga mga lote sa Gawad Kalinga Community Development maoy ipang-apud apod sa mga kawani sa Kapitolyo ug sa mga district hospital sa probinsya sa Sugbo.

Matud pa sa Provincial Administrator sa lalawigan sa Sugbo nga adunay kapin sa 700 nga mahibilin sa tag 50 metros kwadrado ang maangkon sa matag empleyado.

Gani atol sa tigum nila ni Senatoriable Garcia, mga opisyales sa HUDCC, Provincial Administrator Eduardo Habin, Provincial Legal Officer Marino Martinquilla, ug uban pa nakab-ot nila ang kasabotan bahin sa pagpili og developer nga maoy motukod sa mga panimalay.

Hinuon kalabot sa mga pangutana kung kinsa ang maka-avail o makapahimus nga mga trabahante sa nahisgutang programa, si Habin mibutyag nga may gitahasan na ang gobernadora   sa pagpili niini.

Gani   gibutyag usab ni Habin nga maayo na kaayong pagka-andam ang nahisgutang lugar ug nindot kaayo itandi sa ubang mga housing development area nga gitukod sa kagamhanan. (BANAT NEWS)