Plebesito sa Guadalupe di special non-working holiday

CEBU, Philippines - Giklaro sa Commission on Elections (Comelec) nga dili holiday o special non- working holiday ang adlaw unya sa pagpahigayon sa plebisito sa pagbuwag sa Sitio Banawa ug Englis gikan sa barangay Guadalupe ning dakbayan sa Sugbu karung petsa 28 adlaw’ng Sabado sunod semana.

Gipahibawo kini ni Cebu City Election Supervisor for the South District Atty. Edwin Cadungog atol sa gipahigayung forum bahin sa maong adlaw diha sa Guadalupe Gym kagahapon sa alas- 10 sa buntag nga gitambungan sa gibanabanang dul-an sa 500 ka mga tawo.

Unang niabot sa maong forum si Kongresista Tomas Osmeña kinsa mibiya dayon. Sunod nga miabot si kanhi kongresista Antonio Cuenco ug si Mayor Michael Rama.

Matud ni Rama dili siya mangampanya pabor o supak sa umaabot plebisito ug giawhag lang niya ang tanang mga rehistradong botante sa Guadalupe nga mobotar atol sa plebisito.

Ang barangay Guadalupe dunay 28,421 ka mga rehistadong botante apan posible pa kining mosaka tungod sa nagpadayong continuing registration apan giklaru ni Cadungog nga kadto lang nakaparehistrong bag-ong botante o transferee hangtud sa petsa 31 sa milabay’ng buwan sa Marso ning tuiga ang mahimong makasalmot sa plebisito.

Matud ni Cadungog sugdan ang plebisito alas 7:00 sa buntag ug matapos sa alas 3:00 sa hapon. (BANAT NEWS)