14 Patay, 10 angol

TACLOBAN CITY, Philippines — Katorse ka mga tawo ang namatay dihadiha samtang napulo ang nangaangol human mawad-i og brake ug natagak sa kanal ang usa ka trak de karga nga ilang gisakyan diha sa barangay Cabibihan sa lungsod sa Caibiran, Biliran alas- 8 pasado sa gabii niadtong Sabado.

Si Police Officer I Noel Nierva, ang traffic investigator sa kapolisan sa Naval, Biliran nagkanayon ang dump truck gisakyan makighatud sa lubong sa usa ka minatay gikan sa Barangay Villa Caneja, Naval ug padulong na unta sa lungsod sa Caibiran dihang nahitabo ang aksidente.

Giila ang namatay dihadiha mao sila si Honoria Regir, Lolita Gahum, Darwin Sales, Salita Rosite, Anthony Monte, Janet Rosite, Marianito Areglo, Jolita Narido, Renato Escoses, Lito Quinto, Jonalyn Rosite, Josephine Rosite ug Manilyn Rosite.

Laing nakalas mao sila si Jennifer Caliao kinsa namatay samtang gitabang sa Eastern Visayas Regional Medical Center (EVRMC) sa Tacloban City samtang nalandig sa maong tambalanan sila si Rica Mae Escores, Leonilo Rosite, Lina Areglo ug Jeric Areglo.

Laing duha nga naangol ang gidala sa Divine Word Hospital sa Tacloban City, ug upat sa Biliran Provincial Hospital.

Sumala pa ni Nierva gihulman sa barangay kapitan sa Villa Caneja ang maong trak aron kasakyan sa mga mohatud sa lubong. Ang barangay kapitan nga si Lolita Monte usa sa mga misakay sa maong trak ug naapil sa mga nangaangol.

Dugang pa ni Nierva nga ang drayber nga si Antonio Rosite mibutyag nga samtang sila nagdulhog sa karsada diha sa Sitio Atay, sa Barangay Cabibihan kalit nga mibuto ang brake sa trak hinungdan nga nanglayat ang mga pasahero. Si Rosite usa sa mga nangaangol nga gidala sa Biliran Provincial Hospital.

Sa pagkakaron gitun-an pa sa kapolisan si kinsay manubag sa maong aksidente sanglit sagad sa mga nakalas paryente ra sa drayber. (/EIM)(BANAT NEWS)