Suspek nga mipatay sa dalagita sikop

CEBU, Philippines -  Nadakpan sa kapulisan ang usa ka mangulingay nga maoy gidudahang responsable sa pagpatay ug pagtambog ngadto sa atabay sa 14- anyos nga dalagita nga 2nd year high school sa sitio Dalenson sa barangay Tigbawan sa lungsod sa Tabuelan sa nilabay’ng adlaw.

Atol sa followup operation nadakpan sa kapulisan pinangulohan sa hepe niini nga si Insp. Roberto Hugo ang suspek nga si Elmar Montecalvo,34 , silingan ra sa biktima ug pagpanguling ang trabaho.

Matud ni PO2 Gilberto Allego sa Tabuelan Police Station dihang nahinabi sa Banat News dunay mga circumstancial evidence nga na-recover gikan sa suspek sama sa pisi nga nakit-an sa dalan nga gituohang maoy agianan sa biktima pagpauli gikan sa eskuwelahan ug ang usa ka tsinelas sa suspek nga nahabilin sa dalan distansiya sa gi-abandonar nga atabay diin makit-i ang patay’ng lawas sa biktima.

Ang maguwang sa biktima nga higala sa suspek maoy nakamay-ong sa tsinelas nga iya sa suspek ug ang uyoan sa biktima mikonpirmar nga ang pisi nga nakit-an sa crime scene hinuwaman sa suspek.

Mibalik usab ang mga imbestigador sa nahitaboan tungod kay adunay residente nga giingong nakasaksi sa krimen nga posibleng makapalig-on sa kaso.

Sumala pa ni Allego ang suspek mihimakak sa krimen ug nangatarungan nga diha ra kini sa balay ug nanguling atol sa hitabo. Ang teyoriya ni Allego nga posibleng misukol ang biktima ug tungod kay nailhan man niini ang suspek gipatay na lang niya kini ug gilabay sa atabay.

Ang 14 anyos nga biktima magsaulog unta sa iyang adlaw’ng natawhan karung Martes sunod semana ug gihulagway kining buotan ug kugihan moeskuwela. (BANAT NEWS)