Mayor Durano 'isnabon' si P.Noy

CEBU, Philippines - Dili motambong ang grupo ni Danao City Mayor Ramon “Boy” Durano Jr. sa pagbisita ni Presidente Benigno Noynoy Aquino III sa ilang dapit karong adlawa. Si Aquino gikatakdang mopapanumpa sa mga sakop sa Bakud Party sa partido sa igsuon ni Durano nga si Bise Mayor Ramonito Durano tungod sa ilang pakig-alyansa sa Liberal Party sa presidente.

Ang tigpamaba sa mayor nga si Atty. Gloria Dalawampu mibutyag sa mga tigbalita atol sa gipahigayong press conference nga wala gipahibalo ang mayor sa pag-abot sa presidente maong wala gyud kini mangandam. Dugang pa ni Dalawampu nga ang pagbisita ni Aquino walay kalambigitan sa iyang pagkapresidente kay ang katuyoan niini sa pag-anhi isip man pangulo sa ilang partidong Liberal Party. Matud pa sa mayor wala gyud siya makadawat og pahibalo gikan sa kampo sa presidente nga moabot sila sa ilang syudad.

“Wala man mi pahibaw-a nga maabot siya ugma mao nga wala mi preparasyon,” matud pa ni Boy Durano. Ang kanhi mayor nga si mayor Jesus “Don” Durano mibutyag usab nga wala na siya’y plano pang makighimamat sa presidente tungod kay dili na siya sakop sa LP. Si Don Durano nagtuong mapildi gihapon si Davide sa makaduhang higayon karung umaabot nga eleksyon. “(Ang) Mahitabo ana, modaog si Magpale mapildi na si Davide,” matud pa ni Don Durano. Ang LP nakig-alayon karun sa Bakud diin si Atty. Hilario Davide ug Bise Gobernador Agnes Magpale maoy mag-tandem sa gubernatorial ug vice gubernatorial race karung umaabot eleksyon.

Nasayran nga si Don Durano pormal nga miduso sa iyang resignation letter isip chairman sa 5th district sa LP niadtong Hulyo 3 ning buwana. Gipahibalo usab sa managsuong Durano nga molansar sila isip mayor ug bise-mayor sa syudad sa Danao karung umaabot nga eleksyon ubos sa One Cebu Party. (BANATNEWS)