Gipusil patay

CEBU, Philippines - Patay ang usa ka lalaking nag-inom daplin sa dalan duol sa merkado niadtong miaging adlaw sa Sitio Awayan, Barangay Poblacion III, Carcar City mga alas 7:45 sa kagabhion. Ang patay nang nahidangat sa Carcar Provincial Hospital si Elias Alimasag, 53, nga taga Sitio Oliveros, Barangay Canasujan gumikan sa upat ka samad pinusilan niini sa nagkadaiyang bahin sa lawas. Nadakpan sa hot pursuit operation mao si Jessie Aldaya, 28, nga taga Sitio Kalubihan, Barangay Valladolid nga gitumbok nga mamumuno sa biktima. Matud pa ni PO2 Rosendo Binondo, sa Homicide investigator, nga nag-inom lang si Alimasag dihang kalit niduol ang suspetsado dayong pusil sa makadaghang higayon. Upat ka kabhang sa kalibre .45 ug duha ka slug ang na-recover sa kapulisan sa crime scene. Padayon pa nga giimbestigar sa kapulisan ang insidente aron masuta ang motibo sa pagpamusil. (BANAT NEWS)