Talisay jail napili nga city jail of the year

CEBU, Philippines - Ang Talisay City Jail (TCJ) napili nga city jail of the year sa national category ug ang jail warden nga si Chief Inspector Renante Rubio napili usab nga city warden of the year.

Si Rubio nga nahinabi sa Banat News mibutyag nga karong Hulyo 9, 2012 gitakda nga pasidunggan sila didto sa Camp Crame sa Quezon City nga itunol mismo ni Presidente Benigno Aquino III.

Gibutyag ni Rubio nga ang TCJ unang nakadawat sa samang pasidungog niadtong tuig 2008 dihang si Supt. Johnson Calub pa ang nagdumala niini.

Mao pa usab kini ang unang higayon nga siya napiling city jail warden sa national level apan niadtong tuig 2002, 2003 ug 2004 napili siyang district warden of the year sa regional level dihang siya maoy district warden sa Talibon District Jail sa Bohol. Gawas niini napili usab siyang city warden sa regional category gihapon niadtong tuig 2009 dihang siya maoy city warden sa Toledo City Jail.

Gibutyag usab ni Rubio nga usa sa basehan sa nominasyon mao ang pagsunod sa mandato sa bureau nga naglangkob sa pagtudlo og panginabuhian sa inmates, pagtuman sa “no escape policy” o ug sa “no smoking policy” sulod sa city jail.

Si Rubio nagkanayon nag-una sa mga importanteng butang mao nga ang mga piniriso ug mga kawani sa prisohan may komunikasyon kanunay aron kung may problemang motumaw masulbad dayon.

Ang mga binilanggo gihatagan usab kanunay   sa paglaom pinaagi sa paghatag kanila og mga spiritual counsel ug si Rubio mapasalamaton usab sa kagamhanan sa siyudad sa tanang suporta nga gihatag ngadto kanila.

Ang TCJ adunay pito ka mga cottage diin usa niini alang sa mga menor de edad ug usa lang sa mga babaye.

Ang matag cottage adunay piniriso nga 20 ngadto sa 30 ka tawo ug ang katibuk-ang piniriso sa maong bilanggoan mokabat sa 290 ka mga inmates diin unom niini menor de edad ug 35 ang mga babaye.

Sa nahisgutang gidaghanon 20 ngadto 25 porsyento niini   nag-atubang og kasong crime against property nga gilangkoban sa tulis, kawat, ug pagpanglabni ug 15 ngadto sa 20 ang kaso sa ginadiling drugas.  - Brenda D. Batuto/WC (BANAT NEWS)