Gullas wa pa makahukom kun mag-LP

CEBU, Philippines - Wala pa makahukom si Kongresista Eduardo Gullas sa unang distrito sa probinsiya sa Sugbo kung makig-alyansa ba kini sa Liberal Party (LP).

Apan gibutyag sa Kongresista nga ang iyang partidong Alayon sa unang distrito giimbitar sa LP ug sa United National Alliance (UNA) nga makig-alyansa kanila alang sa 2013 elections.

Kahinumduman nga ang mga lider sa dakbayan sa Talisay nagtigom kini diin ilang gihisgutan ang posibleng pakig-alyado sa Alayon ngadto sa LP apan giklaro ni Konsehal Rodi Cabigas dili pa lang dugay nga naghuwat pa sila sa desisyon ni Gullas tungod mao kini ang lider sa Alayon Nacionalista Party sa distrito.

Sa pagkakaron si Gullas miingon nga wala pay gituboy nga kandidato sa pagka-gobernador ang Alayon sanglit nagpadayon pa ang ilang konsultasyon sa mga lider sa ilang partido.

Matud pa ni Gullas lakip sa iyang konsultahon mao ang Nacionalista Party diin masakop sa ilang partido tungod kay dili mahimong modiretso lang siya og pakig-alyado ngadto sa laing partido. (BANAT NEWS)