Inahan sa batang gisubad sa iro gipangita

CEBU, Philippines - Gipangita sa kapolisan sa dakbayan sa Toledo ang iresponsabling inahan nga misalibay sa kalibonan sa patay’ng lawas sa bag-ong natawo niyang anak hinungdan nga gitangag kini sa iro ug gikaon didto sa Sityo Purok barangay Luay sa siyudad sa Toledo niadtong Huwebes sa buntag.

Si SPO1 Roel Tadique sa Toledo City Police   Station mibutyag sa Banat News   nga didto na hikit-i ang patay’ng lawas sa bag-ong natawong bata ilawom sa pinuy-anan sa magtiayong Guillermo ug Efipania   Cabigas.

Ang anak babaye sa magtiayon nga si Ruffa, hingkod, maoy unang nakadiskobri sa ilang iro nga nalingaw kaayo sa gikaon niini ug sa iyang pagsusi didto iyang naklaro nga usa ka gamay’ng bata ang gisubad niini hinungdan nga gi-report dayon niya sa kapolisan.

Ang medico legal officer nga si Dr. Hermes Labrador mikonpirmar nga usa ka bata nga gibana banang usa ngadto sa duha ka adlaw pang natawo, maoy kaon sa iro ug gibana -bana nga tulo ngadto sa upat na ka adlaw kining namatay.

Napalgan sa kapolisan ang plastic bag, lampin ug short pants nga maoy posibling gipustan ug gisudlan sa patay’ng bata didto sa luyong bahin sa barangay hall sa maong lugar.

Padayon pa ang kapolisan sa ilang imbistigasyon pag-ila sa inahan sa bata aron kapahamtangan og silot. (/WC)  (BANAT NEWS)