Balay girakrakan

CEBU, Philippines - Usa ang namatay ug laing usa ang grabeng naangol sa nahitabong pagmasaker sa usa ka pamilya sa Mactan Shrine, barangay Mactan sa dakbayan sa Lapulapu alas-3 pasado ang takna sa miaging kaadlawon.

Ang namatay mao si Prima Aying, 42-anyos, samtang luwas ang bana niini nga si Jerry Aying, 44, ug ilang lima ka mga anak.

Gitumbok ni Jerry ang usa ka Demetrio Malingin ug duha ka mga kauban niini nga maoy nangrakrak kanila.

Si Chief Inspector Condrado Manatad, hepe sa Presinto 2 sa Lapulapu City Police Office (LCPO) nga nahinabi sa Banat News miingon nga si Jerry mibutyag nga nangatulog na sila dihang dunay nanangpit kanila. Sa pag-abli sa iyang asawa sa pultahan nakit-an niini si Malingin kinsa gikatahong nangutana kun asa iyang bana, tungod kay daan nang nasayod iyang asawa nga may bahad si Malingin kaniya gisirad-an niini og balik ang pultahan, matud pang Manatad.

Daling gipatago sa namatay ang ilang lima ka mga anak apan diha na sila paulani og bala ug naigo   ang ginang.

Si Manatad miingon nga nakapasalipod si Jerry sa kongkretong bungbong ug wala maigo.

Dugang pa ni Manatad nga human sa maong pagpamusil si Demetrio ug ang duha ka mga kauban daling misibat pahilayo sa maong lugar. Mihingalan usab si Aying sa laing kabanay ni Malingin nga ginganlan og Jay nga kauban ni Demetrio sa maong hitabo. Gitug-an ni Manatad nga si Malingin naila sa maong dapit sa pagpayuhot og shabu ug giangkon usab ni Jerry ngadto kaniya nga namaligya usab kini og shabu kaniadto apan mibiya na sa maong ilegal nga kalihokan.

Gikatahong gibaharan sila ni Malingin nga pamatyon lakip na iyang pamilya human nila kini ikiha tungod sa pagpatay sa manghod ni Jerry nga si Roy niadtong Nobiyembre sa nakalabay’ng tuig tungod gihapon sa ilegal nga drugas. (EIM)  (BANAT NEWS)