Polis gikan sa korte gipatay

CEBU, Philippines - Gisugat ug gipusil upat ka higayon sa dughan ug namatay diha-diha ang usa ka polis sa iyang paggawas sa korte human sa iyang pagtambong sa husay sa kasong iyang giatubang diha sa Danao City Regional Trial Court sa barangay Poblacion sa siyudad sa Danao kagahapon sa buntag.

Ang patay nang nadangat sa tambalanan mao si SPO2 Roberto Canencia, anaa na madistino sa Cebu Police Provincial Office (CPPO), anaa sa floating status human kini giingong nalambigit sa kaso sa ginadiling drugas.

Duha ka mga lalaki ang gitumbok sa mga saksi nga responsable sa krimen nga wala magsul-ob og tabon sa ilang nawong.

Matud ni SPO2 Ildefonso Prosia ang desk officer sa Danao City Police dihang nahinabi sa Banat News gikan pa mitambong sa husay sa iyang kaso si Canencia diha sa sala ni Danao City RTC Judge Josefa Paderanga.

Sumala pa nga tungod sa kadaghan sa husayonong kaso sa maong sala gioktaba una ang husay sa kaso sa biktima hinungdan nga migawas kini sa korte aron mopauli.

Apan pag-abot niya sa gawas nga bahin duol sa terminal kalit lang kining gisugat sa duha ka mga lalaki ug gitabangan og pusil. Upat ka samad pinusilan sa dughan ang nahiaguman ni Canencia.

Ang pagpamusil nahitabo 250 metros lang gikan sa Danao City Police Station maong daling nakaresponde ang ilang mga kaubanan uban ang Field Trainee Police human makadungog sa butobuto sa armas. Apan wala na diha ang mga mamumuno ug nagbuy-od na sa dalan si Canencia. Mga basiyo sa kalibre .45 nga bala ang nakuha diha sa crime scene.

Si Canencia nag-atubang og kasong kalapasan sa Akta Republika 9165 ug nabutang sa floating status human kini maabti sa mga sakop sa Provincial Intelligence Branch (PIB) sa CPPO didto sa pinuy-anan sa gitumbok nga druglord nga si Marites Dalompenes niadtong miaging tuig diin kini gisikop ug giapil sa gipasakaan og kaso.  EIM - BANAT NEWS