Managpuyo gi-ambush

CEBU, Philippines - Patay ang usa ka babaye ug kritikal usab ang kapuyo niining lalaki dihang sila gipamusil sa duha ka armadong lalaki nga nagsakay og motorsiklo alas-8 pasado ang takna sa miaging gabii sa sitio Bohol-Bohol, barangay Looc, dakbayan sa Mandaue.

Ang namatay mao si Melanie Sagaad, 35, minyo apan bulag sa iyang bana ug nagpuyo na sa maong dapit samtang talandugon ang kahimtang sa karelasyon niining si Armado Irog-Irog, 41, lumad nga taga barangay Poblacion sa Liloan.

Wala pa matumbok sa kapolisan kung si kinsa ang duha ka lalaking mamumuno nga kasarangan ang pamarog ug gidak-on sa panglawas nga pulos nagsul-ob og closed-type helmet, nagsul-ob og itom nga jacket ug nagsakay sa XRM nga motorsiklo nga kolor blue apan wala makuha ang plate number niini.

Si PO1 Eleazar Ramil sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miingon nga gikan pang gikuha ni Irog-Irog si Sagaad sa trabahoan niining gasolinahan sa dalan Hernan Cortes sa barangay Banilad sa maong dakbayan. Samtang padulong na sila mamauli kalit silang gidasmagan sa motorsiklo sa maong mga lalaki diha sa eskina sa sitio Bohol-Bohol hinungdan sa pagkalamba sa duha taliwala sa karsada.

Matud pa ni Ramil nga wala pa makabangon ang mga biktima gikan sa ilang pagkalamba ang backrider sa midasmag nga motorsiklo nagdali sa pagkanaog ug gipamusil ang ilang mga ulo ug kalawasan.

Human sa maong pagpamusil misakay og balik ang backrider sa motorsiklo ug nagdali pagbiya sa lugar.

Ang mga biktima gidala sa mga silingan ngadto sa Mandaue City Hospital apan si Sagaad nga nakabaton og grabeng samad pinusilan sa ulo ug kalawasan gideklarar sa mga doktor nga dead on arrival. Si Irog-Irog human mahatagi og pasiunang pagtambal sa mga doktor gibalhin ngadto sa Vicente Sotto Memorial Medical Center sa dakbayan sa Sugbo.

Nag-unang anggulo nga gisubay sa imbestigasyon sa maong krimen mao ang love triangle tungod kay minyo man ang namatay ug nakigpuyo og lain. (BANAT NEWS)