Kampanya vs dengue sa Lapu' epektibo

CEBU, Philippines - Gihulagway ni Lapulapu City Health Officer Dr. Rodolfo Berame nga epektibo ang ilang kampanya kontra lamok nga nagdala og sakit nga dengue karong tuiga ug mihimakak sa migawas nga balitang tulo na ka kinabuhi ang nakalas sa dakbayan tungod sa maong sakit sukad sa bulan sa Enero hangtud ning bulana.

Matud pa ni Berame wala siya masayod kung diin nakuha sa Regional Epidemiology Surveillance unit (RESU) ang maong data diin base sa ilang talaan sa City Epidemiology Surveillance Unit (CESU) adunay 83 ka kaso sa dengue gikan sa bulan sa Enero hangtud Hunyo ning tuiga ug usa pa lamang ang namatay niini.

Kung itandi sa milabay’ng tuig 2011 gikan sa bulan sa Enero hangtod Hunyo mitala og 125 ka kaso apan walay namatay. Karong tuiga mas minus ang kaso sa dengue sa dakbayan sa Lapulapu.

Sa milabay’ng bulan sa Enero ning tuiga usa ka 8-anyos nga bata nga residente sa Mactan ang namatay sa Chong Hua Hospital.

Ang pagminus sa kaso sa dengue ning tuiga sa Lapulapu giingong bunga kini sa subsob nga kampanya batok sa lamok nga nagdala niini.

Usa na niini ang padayong implimentasyon sa “Oval Larval Trapping” nga usa ka paagi pagpatay sa mga waya-waya nga gihimo sa matag tunghaan nga namatud-ang epektibo.

Duna say programang Student Dengue Brigade ug mga Barangay Dengue Brigades nga kanunay nga nanglimpyo sa palibot.

Ang mga barangay nga dunay daghang kaso sa maong sakit mao ang Basak, Gun-ob, Pajac, Pusok ug Bankal nga mao karoy sentro sa kampanya batok dengue. (BANAT NEWS)