Gipusil sa igsoon kritikal

CEBU, Philippines - Kritikal ang kahimtang sa 54 anyos nga mag-uuma human unaya og pusil sa iyang manghod didto sa bukirang bahin sa barangay Banlot, lungsod sa Sibonga niadtong Domingo sa alas 9:00 sa buntag.

Ang biktima mao si Alejandro Ordieneza Almero, 54, minyo, mag-uuma, ug nagpuyo sa maong lugar.

Samtang ang suspek mao ang iyang manghod nga si Alex Almero, 38, minyo, nga   silingan sa biktima.

Si PO3 Franklin Gako sa Sibonga Police Station mibutyag sa   Banat News   nga ang biktima ug ang suspek nga dugay nang nagkabangi nagka-abot sa usa ka barangay road samtang nagsag-ob sila og tubig. Tungod kay nagkadumot na, kalit lang misilaob ang kasuko sa usa’g-usa dihang nagkabagat sila ug miulbo ang lalis.Tungod sa kainit sa lalis, nagkahinagitay ug nagbinaharay   ang usa ug usa hangtod nga mipauli sa ilang balay ang suspek.

Apan sa pagbalik niini nagbitbit na og armas de fuego ug diha-diha giluthang dayon niya ang biktima. Nahagba sa yuta ang biktima nga samaron sa nagkalainlaing bahin sa lawas ug tungod kay nagtuo nga patay na mibiya dayon ang suspek sa maong lugar.

Apan ang mga silingan nga nakasaksi maoy mipahibawo sa kapolisan sa maong hitabo busa nahatud ngadto sa Carcar City District Hospital   ang biktima apan gibalhin kini sa tambalanan sa dakbayan sa Sugbo.

Sa pagkakaron padayon pang gipangita sa kapolisan ang suspetsado aron makapanubag kini sa sala nga iyang nabuhat ngadto sa iyang igsoon.  (BANAT NEWS)