Cabahug gihulipan na

CEBU, Philippines - Hingpit na nga gihulipan ni Mayor Jonas Cortes si Dr. Susana Cabahug gikan sa pagdumala sa Mandaue City College (MCC) Sports Complex human matudlo ang bag-ong administrador sa maong tulunghaan.

Ang gihulip kang Dr. Cabahug mao si Dr. Teresa Heyrisa Inot.

Si Inot maoy napili sa usa ka search committee nga gipangulohan   ni Mayor Cortes gikan sa unom ka mga aplikante alang sa maong katungdanan

Si Inot nagtrabaho sa Pag-ibig Fund office ug nagtudlo usab sa mga   unibersidad ug kolehiyo sa Sugbo sulod sa nakalabay na nga mga katuigan.

Naglakip sa mga tulunghaan nga diin nahimong professor si Dr. Inot mao ang San Jose Recoletos University ug Center for International Education.Kahinumdoman nga si Dr. Cabahug maoy gitudlo ni Mayor Cortes nga modumala sa MCC sports complex campus dihang miasumer kini sa iyang katungdanan isip mayor sa dakbayan. Samtang gihulipan si Dr. Cabahug sa iyang katungdanan, si Dr. Paulus Cañete padayon pa gihapon nga nagdumala sa orihinal nga MCC nga nagbase sa barangay Tipolo sa maong dakbayan. (BANAT NEWS)