Pacquiao "Gitikasan"

CEBU, Philippines - Nakugang ug naghinuktok sa makadiyot ang tibuok nasud dihang wala damha nga mapilde ang giisip nga ‘pambansang kamao’ ug Filipino boxing icon nga si Manny “Pacman” Pacquiao batok sa Amerikanong si Timothy Bradley kagahapon didto sa MGM Grand Garden Arena sa Las Vegas, Nevada.

Migawas dayon ang mga pagdudang natikasan gyud og maayo si Pacquiao ug gibasol ang duha ka mga hurado nga pabor ni Bradley, samtang dunay mga nagdudang posibleng gituyo kini aron duna pay mahitabong rematch tali nila ni Bradley.

Sa pagsugod palang si Pacquiao na maoy grabe ka-inilog, apan daw nahugno ang mga boxing fans dihang napakyas siya pagdepensa sa iyang WBO welterweight title batok ni Bradley kinsa midaog pinaagi sa usa ka kontrobersiyal nga 12-rounds split decision.

Sa unang round, agresibo si Bradley apan mas mipatigbabaw ang abilidad sa Pinoy boxing superstar kinsa mipaigo og mas solidong mga kinumo nga diriyot mopatumba ni Bradley. Gani nagkaliponglipong kini sa 4th round apan naabtan sa bagting.

Padayon nga nakigsinukliay si Bradley og kinumo ni Pacquiao sa eight ug ninth round. Miaksyon paghinay si Bradley sa eleventh round nga maoy gipahimuslan ni Pacquiao aron makapabor unta sa puntos, apan wa niya mabantayi ang pipila ka counter-punches sa Amerikanong boksidor. Human sa dose ka hugna nga sinukmagay, gi-anunsiyo ang resulta sa score cards sa tulo ka judge diin si sila si judge CJ Ross and Duane Ford mihatag og 115-113 ngadto ni Bradley, samtang bugtong si judge Jerry Roth ang miiskor og 115-113 ngadto ni Pacquiao.

Matud pa sa komentarista sa HBO pay-per-view human sa away pito ka rounds ang gidaogan ni Pacquiao samtang lima kang Bradley.

Ang maong hukom gikan sa mga boxing judge daling miani og pagsaway human mismo sa pagdeklarar ni Bradley isip bag-ong kampiyon diin mga Filipino ug American boxing fans ang nagdungan pag-‘boo’ samtang nagselebrar si Bradley.

"I do my best and I guess my best wasn't good enough," matud pa ni Pacquiao. "I've been watching the tapes of his fights. Tonight, he never hurt me. Most of his punches hit my arms. I don't know what happened with the scoring. I have no problem. I'll be ready for the rematch. No doubt I won the fight."

Mismo si Bradley miangkon nga nakugang siya sa resulta sa away, apan nagpasalamat tungod kay mibunga ang iyang paningkamot sa training. “Pacquiao’s a beast,” matud pa niya. “It was a good fight. Every round was close. Pacquiao won the early rounds. I controlled the later rounds with my jab.”

Human sa away gipagawas ang statistics sa dose ka rounds diin migawas nga mipatugpa og 253 sulod sa iyang 751 ka kinumo si Pacquiao o 34% connect rate, samtang si Bradley igo lang nakapasud og 159 sa iyang 839 ka kinumo nga gibuhian o 19% connect rate.

Tungod niini daghang nasagmuyo sa resulta, gani ang nagkadaiyang mga eskperto sa boksing nga nagtan-aw natingala gyud sa maong desisyon.

Tungod usab sa maong daw lahi nga pagtan-aw sa duha ka judge itandi sa nakita sa mga tawo ug sa mga media sa ringside, possible pang mawagtang na gyud ang gipangandoy sa boxing fans nga mega fight ni Pacquiao ug Floyd Mayweather Jr. Sa website sa Yahoo, ang Yahoo! Sports miiskor og 117-111 pabor kang Pacquiao, susama sila og gihatag nga iskor nila ni Tim Dahlberg sa Associated Press (AP) ug Steve Carp sa Las Vegas Review-Journal.

Samtang si Dan Rafael sa ESPN mihatag og 118-110 pabor ni Pacquiao ug sa HBO nga si Harold Lederman miiskor og 119-109, o tanang onse ka rounds iya ni Pacquiao.

Gani, si Top Rank boss, Bob Arum, usa sa mga nahibulong sa resulta apan nagtuong kung dunay rematch sa duha mohakot kini og dakong salapi. "This is a death knell for boxing, and I'm going to make a ton of money on the rematch," matud pa ni Arum sa Yahoo Sports.

Sama sa mga nangaging away ni Pacquiao, walay bisan usa ka krimen nga nahitabo nga natala ang kapolisan sa dakbayan sa Sugbu kagahapon gawas lang sa usa ka shooting alarm nga padayon pang giimbestigar sa kapolisan. (EIM)(BANAT NEWS)