Mandaue may bag-ong jail warden

CEBU, Philippines - Milingkod na sa katungdanan isip bag-ong jail warden sa Mandaue City Jail si Chief Inspector Gil Inopia nga mihulip kang Jail Superintendent Jessie Calumpang kinsa girelibohan sa iyang katungdanan.

Ang pagrelibo kang Supt. Calumpang nahitabo human mopuga ang pinirisong si Ricky Andojar pagkahuman sa hearing sa iyang kaso nga pagpanulis, paghupot og ilegal nga armas ug uban pa sa miaging adlaw sa Palace of Justice.

Si Calumpang temporaryong gidistino karon sa ilang rehiyonal nga buhatan samtang si JO2 Yolando Salazar   nga maoy gieskapohan ni Andojar atua usab idistino sa Municipal Jail sa lungsod sa Consolacion. 

Si Chief Inspector Inopia nga nahinabi sa Banat News miingon nga dako pa ang ilang pagtuo nga si Andojar   ania pa gihapon sa Sugbo magtagotago.

Gumikan kay naalerto na usab karon ang kapolisan sa tibuok lalawigan dako ang iyang pagtuo nga madakpan nila pagbalik si Andojar aron mabalhog kini sa bilanggoan.

Si Chief Inspector Inopia miingon nga human makapuga si Andojar higpit nilang gipahimangnoan ang mga jail guard nga gikan sa husay kinahanglang pasakyon dayon deretso ang piniriso sa ilang sakyanan aron ipaslak kini pagbalik sa prisohan. (BANATNEWS)