DEPED andam na sa K-12 ug pagbukas sa klase
CEBU, Philippines - Andam na ang tanan alang sa pagpatuman sa K – 12 educational system ug sa pagbukas sa klase sa tanang tulunghaan karong Hunyo 4, 2012, sumala ni Regional Director Carmelita Dulangon sa Departmenrt of Education (DepEd)7 kagahapon.
Atol sa Kapihan sa PIA nga gipahigayon didto sa buhatan sa DepEd 7 Regional Office sa Ecotech, Lahug, ning dakbayan sa Sugbo si Dulangon mibutyag nga nagpadayon na ang pagbansay sa tanang magtutudlo sa kindergarten ug sa Grade 7 sa Cebu Business Hotel ning dakbayan.
Sa maong tulumanon nga gipalanog usab sa DYMR Radyo ng Bayan, si Dulangon nagkanayon nga ang kaandam usab sa pagbukas sa klase karong Hunyo 4, ipahapsay pinaagi sa paglusad sa Brigada Eskwela nga nagpadayon sa pagkakaron.
Gipasabot ni Dulangon nga ang tanang mga pagduhaduha sa mga tigpaniid kalabot sa ka-epektibo sa bag-ong sistema sa edukasyon mahatagan kini og katin-awan pinaagi sa nagkadaiyang mga ahensya sa kagamhanan nga motambayayong aron gayud ang mga estudyante ubos sa K –12 makabaton og maayong kaugmaon.
Matud pa niya nga una ilusad sa kagamhanan ang K – 12 nga sistema, gitun-an na ang posibleng suliran nga atubangon sa mga estudyante ug sa mga ginikanan ilabi na sa mga kabus nga pamilya ug sa posibling solusyon niini.
Kun hisgotan ang pinansyal nga suliran nga mahimong hinungdan nga dili makatungha sa kolehiyo ang estudyante, gitahas kini sa DepEd ngadto sa Technical Education Skills and Development Authority (TESDA) ang maong problema aron bansayon ang bata nga makakita og trabaho bisan dili makatunob og college.
Kun hisgotan ang ka way pagkaon, moabag sa DepEd ang Department of Social Welfare and Development (DSWD) sa pagpahigayon og feeding program aron makakaon ang mga estudyante.
Kun magmasakit ang estudyante, moabag ang Department of Health (DOH) aron hatagan og tambal ang mga kabataan. Gipasalig ni Dulangon nga sa K –12 system walay ikabalibad ang estudyante ug mga ginikanan aron nga dili molampos sa pag-eskuyla ang hingtungdan. (BANAT NEWS)
- Latest
- Trending
