Polis gireklamo

CEBU, Philippines - Usa ka pulis ang gireklamo sa usa ka ahente sa usa ka hardware tungod sa pagpanghulga niini kaniya. Si Jade Monisit,30, salesman sa Atlantic Hardware, midangop sa Investigation and Detective Management Branch (IDMB) sa Cebu City Police Office (CCPO) kagahapon sa udto ug gireklamo si PO2 Rico Caballero sakop sa Fuente Police apan kasamtangan nga gibalhin sa buhatan ni CCPO Director Sr. Supt. Melvin Ramon Buenafe. Sa asoy sa reklamante nga niadtong Sabado sa buntag samtang siya nag-atiman sa ubang mga customer miduol kaniya si Caballero ug nangutana kun pila ang presyo sa iyang paliton. Apan dihang iyaha kining giingnang humanon una niya ang nakauna nga customer giingong nasuko kini ug gibunlot ang iyang I.D. ug gihunghungan siya niini og “ unsay gusto nimo .38 o .45?” nga sa iyang pagpaminaw daw hulga sa iyang kinabuhi.

Si Buenafe nagkanayon nga iyang ipa-imbestigar si Caballero.

Gipaabot sa mga tigbalita si Caballero nga mobutho sa IDMB aron pagkuha sa iyang habig kagahapon apan wala kini moabot kutob alas-2 sa hapon. ( EIM) - BANAT NEWS