Luigi nalipay sa iyang promosyon

CEBU, Philippines - Giisip ni Kongresista Gabriel Luis Quisumbing sa ika-unom nga distrito sa lalawigan sa Sugbo nga dako niyang dungog ang pagpatong kaniya og katungdanan isip lieutenant colonel sa Armed Forces of the Philippines Reserve Force sa Naval Reserve Command (AFP-NAVRESCOM)

Isip usa ka reservist gisaad ni Quisumbing nga andam siya pagtuman sa iyang tahas pinaagi sa pag-alagad sa tibuok niyang kinabuhi alang sa pagpanalipod sa nasud.

Sama sa usa ka sundawo si Quisumbing nagkanayon nga anhi niya ibuhos ang iyang panahon sa pag-atiman sa iyang mga konstituwente sa ika-unom nga distrito ug sa katawhan sa tibuok nasud diin ang iyang katungdanan isip reserba nga sundawo sa panahon sa kagubot ialagad niya.

Si Quisumbing usa ka kanhi major sergeant   sa wala pa siya ma-promote ngadto sa taas nga ranggo.

Napasidunggan usab siya og usa ka medalya isip military merit award gumikan sa kaaktibo niya sa serbisyo isip usa ka opisyal nga reserba sa 82nd Marine Battalion Reserve atol sa gipahigayong Humanitarian Assistance Operation sa Philippine Navy.

Nahatagan usab siya og pasidungog sa NAVRECOM gumikan sa maayong liderato sa pagpanghatag og mga hinabang sa mga apektado sa bagyong Sendong didto sa Cagayan de Oro City gikan niadtong Disyembre 20, 2011 ngadto sa Enero 2, 2012. (BANAT NEWS)