Libaong sa mambaling nasulbad

CEBU, Philippines - Walay kasudlan sa ilang kalipay ang mga molupyo sa Alaska, Mambaling sa dakbayan sa Sugbu nga nagpahimulos na karon sa aspaltadong kalsada ilabi na sa prinsipal sa Alaska Elementary School ug sa prinsipal sa Alaska Night High School tungod sa dugay nilang giantos nga libaong ug lapokong kadalanan sa milabay nga katuigan.

Mibutyag ang elementary prinsipal nga si Lyra L. Illaga nga kaniadto, daghang mga faculty members nga nakuhaan sa ilang gisabak tungod sa kusog nga untol-untol sa traysikad nga ilang sakyan padulong sa trabaho ug pauli sa ilang balay.

“Nalipay kaayo mi ani nga proyekto ug magpasalamat mi nilang Mayor Micahel Rama ug barangay captain Rudy Estella sa ilang pagdason sa among dugay nang gihangyo pagpa-ayo sa kadalanan,” matud pa ni Illaga. Mas mosamot pa gyud siya'g kalipay kung tumanon ni Estela ang iyang gisaad nga usa ka covered court sulod sa elementary campus nga mahimong gamiton sa bisan unsang kalihokan sa eskwelahan.  

Sa iyang bahin, mipadayag usab sa samang kalipay ang Alaska Night High School principal Emiliano Bustamante kinsa mibutyag nga usa niana ka higayon, ang iyang maestra nga si Nenita Fernandez nahulog sa gisakyan niining traysikad.

"Nindot na gyud kaayo ang dalan karon kung itandi sa miaging mga tuig. Dili na ta mabun-og kung magsakay og traysikad kay wala nay lapok ug libaong," matud pa niini.

Si Bustamante kinsa usa pa lang ka tuig nahimong prinsipal, nakapa-usbaw na sa enrollment sa mga estudyante gikan sa 325 sa miaging tuig ngadto na sa 530 karong tuiga.

Bisan sa hagip-ot sa ilang opisina, nag-agwanta silang 12 ka magtutudlo sa usa ka electric fan. Adunay duha ka regular teachers ang Alaska Night High School ug may 11 ka contractual nga gisweldohan sa Cebu City Hall . Nagsilbi kining mga part-timers kinsa nagtrabaho kung buntag ug magtudlo gikan sa alas 4:20 sa hapon ngadto na sa alas 9:40 sa gabii human sa ilang oras sa pagtudlo didto sa Don Carlos A. Gothong Memorial National High School.

Gihimo ni Bustamante ang kahigayonan sa pagbisita sa Banat News aron paghangyo niadtong may malumong kasingkasing sa pagdonar og mga butang nga magamit sa ilang eskwelahan ilabi na gyud mga text books ilabi na karon kay subsob ang ilang pagpangandam sa proyekto sa Department of Education ang Brigada Eskwela.  (BANAT NEWS)