2 patay sa bangga sud sa 15 minutos

CEBU, Philippines - Duha ang namatay sulod sa 15 minutos sa duha ka aksidente sa dalan diin usa niini 7-anyos nga nadasmagan og motorsiklo sa national highway sa barangay Bagakay lungsod sa Sibonga niadtong Lunes sa alas 5:45 sa hapon.

Ang biktima mao si Johnryll Espanola, 7, nagpuyo sa maong lugar samtang padayon pang gipangita sa kapolisan ang drayber sa mi-hit and run nga motorsiklo nga daling miikyas human sa hitabo.

Matud ni PO2 Arnold Frenal ang desk officer sa Sibonga Police Station dihang nahinabi sa Banat News ang biktima kauban sa iyang maguwang naglakaw sa dalan dihang nahitabo ang aksidente.

Sumala pa niini mitabok og una ang maguwang hinungdan nga nagdali sa paggukod ang biktima apan sa paglabang niini naatol usab sa pag-agi ang naghaguros nga motorsiklo ug nadasmagan ang bata.

Bisan sa pagkalagpot sa bata wala matumba ang drayber apan inay mohunong aron tabangan ang bata mipasutoy hinuon kini palayo. Ang mirespondeng mga polis na maoy mitabang sa biktima ug gidala sa DeparieneHospital apan patay na kini.

Samtang sa laing aksidente patay dihadiha ang usa ka construction worker nga si Jinnylito Tanahora, 39, ug naangol ang asawa niini nga si Margarita Tanahora dihang nadasmagan og Ceres Bus ang ilang motorsiklong gisakyan sa barangay South Poblacion sa lungsod sa San Fernando niadtong Lunes sa alas 5:30 sa hapon.

Ang drayber sa bus nga dunay plate number FVW-559 nga si Ronnie Villaros, 29, taga Villahermoso, Negros Orriental kasamtangan karong gitanggong sa kapolisan alang sa pagpasaka og kaso.

Matud ni PO3 Julius Cesar Parages sa San Fernando Police Station nga nakahinabi sa Banat News gikan sa merkado ang mga biktima luwan sa motor padulong na pauli sa barangay Tinubdan. Apan sa pagtabok sa crossing sa mga biktima napunggit kini sa bus nga gikan sa siyudad sa Sugbo paingon sa Barili hinungdan sa pagkadaro sa duha ug nangalabay sa sementadong dalan.

Ang duha gihatud dayon sa South General Hospital sa siyudad sa Naga apan namatay gyud si Jinnylito, ang asawa niini gilahos pagdala sa tambalanan sa dakbayan sa Sugbo. (BANAT NEWS)