Mikuyog sa ginikanan pag- panginhas 4-anyos nalumos

CEBU, Philippines - Patay nang napalgan sa mga ginikanan ang ilang 4-anyos nga anak nga babaye human kini malumos atol sa ilang pagpanginhas sa hunasan sa barangay Subabasbas sa dakbayan sa Lapulapu sa milabay’ng adlaw.

Ang nalumos mao si Cherry Ann Alegre, 4, residente sa maong dapit kinsa uwahing nakit-ang buhi sa mga ginikanan nga nagduwa sa hunasan samtang sila nanginhas nianang tungora.

Pipila ka gutlo mga alas 9:00 sa buntag nakita sa mga ginikanan nga naglutaw nalang ang ilang anak ug wala nay kinabuhi apan ilaha kining gidala sa tambalanan apan gideklarar kining patay na.

Gumikan niini mipahimangno ang kapolisan sa mga ginikanan nga dili dad-on sa panikaysikay ang ilang mga anak aron dili madisgrasya.  - BANAT NEWS