Rob gang nakaipsot sa Negros

CEBU, Philippines - Hingpit nang nakaikyas ang mga tulisan nga miigo sa usa ka forwarding company sa barangay Looc, dakbayan sa Mandaue ug giingong didto mitabok sa Negros diha agi sa lungsod sa Balamban sa ilang pagbiya sa Sugbo.

Kini ang gitug-an ni Chief Inspector Michael Anthony Bastes, ang hepe sa Investigation Detection and Management Bureau (IDMB) sa Mandaue City Police Office (MCPO).

Dugang pa niya nga gipadala na nila ang kopya sa footage sa close circuit television (CCTV) ngadto sa ilang mga kaubanan sa Manila ug Mindanao nga posibleng lutsan sa grupo nila ni Reynante Paracuelles ug Claudio Castillo.

Hinuon si Sr. Supt. Noel Gillamac, direktor sa MCPO mipahimangno sa mga financial institutions dinhi sa Sugbo nga di mokompiyansa ug palig-onon pa ang seguridad sa ilang mga patigayon.

Si SPO3 Marcos Noval sa IDMB nga nahinabi sa Banat News miingon nga giandam na nila ang mga dokumento aron makapasaka og kaso lakip na ang pinirmahang pamahayag sa mga biktima ug testigo.

Si Paracuelles alyas Yokyok ug Castillo alyas Ompong nakuhaan og video footage sa maong establisamento maong sila daling nailhan  Ang grupo giingong nakadala og P360,000 nga salapi ug mga cellphone sa maong kompanya.

Ang grupo nga usa ka dakong robbery gang nga nagbase sa Ozamis City mitulis sa APL Corporation Ptc Ltd. ug APL Logistics Phils. human nila gaposa ang gwardiya ug warehouse man.

Naglakip sa mga pagpanulis nga gikalambigitan sa mga suspetsado mao ang pagtulis sa UCPB niadtong 2007, Land Bank of the Philippines niadtong 2008, Bangko De Oro Dasmariñas 2010 ug uban pa.

Gituohan usab nga kauban ang maong grupo sa mga tulisan nga si Junjun Cabando nga maoy lider sa mga tulisang nakasibat sa pagtulis sa Robinson Mall sa dakbayan sa Sugbo nga nahitabo sa miaging tuig nga miresulta sa kamatayon sa duha ka gwardiya ug tulo ka mga tulisan. (BANATNEWS)