Kanhi mayor ibalhi'g prisohan

CEBU, Philippines - Higpit nga gibantayan karon sa mga guwardiya sa Cebu Provincial Detention and Rehabilitation Center (CPDRC) ang kanhi mayor sa Lezo, Aklan nga nagkagulkol karon sa maong prisohan tungod sa kadaghan na sa mga warden ug mga jailguard nga natangtang kay nihatag og special treatment kaniya.

Matud pa ni manlalaban Lito Astillero ,chairperson sa Committee on Discipline and Investigation (CODI) nga ang buhatan ni Governor Gwendolyn Garcia mohimo unya og tukmang lakang batok ni mayor Alfredo Arsenio sa Lezo, Aklan.

Nalantaw sa gobernador nga gumikan kang Arsenio, nataktak na sila si jailwarden Alger Commendador ug Napoleon Miranda ug may lain pang jailguard nga natangtang ug gipaubos sa imbistigasyon human masakpang mihatag gihapon og special treatment kang Arsenio.

Hinuon giangkon ni Astillero nga ang maong piniriso naghatag og dakong labad sa ulo sa mga nagdumala sa CPDRC karon.

Apan iyang gitataw nga ang buhatan sa gobernador mohimo og tukmang lakang kalabot niini.

Iyang gibutyag nga gimanduan sila ni Gobernador Garcia sa pag-review sa legalidad sa pagpaslak kang Arsenio sa CPDRC ug posible nga ilang pangayuon sa korte ang pagbalhin sa nahisgotang piniriso ngadto sa laing bilanggoan.

Nasayran nga si Arsenio nag-atubang og kasong murder human kini pasanginling mipusil patay sa usa ka komentarista sa radyo didto sa Aklan.

Tungod sa dili patas nga pagtratar sa kaso niini, ang pamilya sa biktima mihangyo sa korte nga ibalhin ang bista sa kaso niini dinhi sa Sugbo ug dinhi usab ipapriso si Arsenio hinungdan nga gibalhug kini sa CPDRC.

Matud pa sa mga tigpaniid nga samtang anaa pa si Arsenio sa CPDRC tataw kaayo nga mag-anam ka daghan ang mga warden ug jailguard nga mataktak ilabi na kun dali kaayong mokubit sa paon ni Arsenio nga ilawog kanila. (BANATNEWS)