Driver milugos sa humabdos sikop

CEBU, Philippines - Nadakpan sa kapolisan kagahapon sa buntag ang usa ka amahan nga miunay og lugos sa dalagita niyang humabdos sulod sa lima na ka tuig didto sa Sitio Lamak, barangay Nangka lungsod sa Balamban.

Ang nadakpan mao si Sonny Tundag, 42, minyo, drayber sa sikad-sikad ug bana sa inahan sa biktima nga nagpuyo sa maong lugar.

Samtang ang biktima kinsa usa ka 17 anyos, gitago lang sa ngalang Inday.

Si SPO1 Julius Obanana sa Balamban Police Station mibutyag sa Banat News nga ang iyang mga kauban nga gipangulohan ni PO2 Darwin Suico nagpatrolya sa maong lugar.

Unya dihang nahiagi kini duol sa balay sa suspek kalit lang migawas ang biktima nga naghilak ug miduol kini sa mga polis ug nangayo og panabang.

Atol sa pagsukit- sukit sa kapolisan misumbong ang biktima nga gilugos siya sa iyang ama-ama ug mao pay pagkahuman niini hinungdan nga gisikop dayon sa mga otoridad ang suspek   sa ilang balay.

Atol sa imbistigasyon sa kapolisan sa biktima gitug-an niini nga gikan pa niadtong nagpangidaron siya og 12 anyos kanunay na siyang hilabtan sa suspek ug adunay mga higayon nga sagunsonon siya sa paggamit niini sulod ra sa ilang balay ilabina kun molakaw ang iyang inahan.

Matud sa biktima nga wala siya makahigayon pagsumbong sa hitabo tungod kay gibaharan siya nga patyon.

Ang biktima kinsa kamaguwangang anak sa gawas, sa asawa sa suspek, adunay upat ka gagmay’ng manghod nga anak na gayud sa suspek ug sa inahan sa biktima.

Ang inahan sa biktima determinado gyud nga mopasaka og kaso batok sa suspek ug gisuportahan usab kini sa mga opisyal sa Department of Social Welfare Services (DSWS) sa pagpasaka sa maong kaso ngadto sa korte. Samtang nagtingkagol na karon sa karsel ang suspek.  - BANAT NEWS