Lalaki gipusil duol sa anak

CEBU, Philippines - Nabuslot ang kilid nga bahin sa lawas sa usa ka tawo nga biktima sa pagpamusil sa iya rang silingan sa sitio Ibabao, barangay Tugbongan, lungsod sa Consolacion alas-11 pasado ang takna sa buntag niadtong miaging Domingo.

Ang biktima mao si Gilbert Antolijao, 38, ug ang gitumbok nga nagpusil sa biktima mao si Joel Tumungha, 30.

Si PO1 Harly Ytang sa kapolisan sa maong lungsod nga nahinabi sa Banat News miingon nga nakig-estorya niadtong tungora ang biktima sa iyang mga higala dihang miabot ang suspek ug kalit kining gipusil.

Matud pa ni Ytang nga ang 13- anyos nga anak sa biktima diha dapit atol sa pagpamusil ug maoy miila sa suspetsado.

Dugang pa ni Ytang nga ang biktima nga nagsapyang sa samad pinusilan sa iyang tiyan nakadagan palayo sa suspek samtang kini gipaulanan og bala.

Ang suspetsado daling miikyas human sa hitabo, samtang ang biktima gidala sa Eversly Child Sanitarium Hospital.

Si Ytang miingon nga subay sa gitug-an sa anak sa biktima dugay nang nagkabangi ang iyang amahan ug ang suspek ug kanunay na nga atangan sa naulahi.  - BANAT NEWS