Gi-Knockout samanghod patay

CEBU, Philippines - Usa ka 18-anyos nga lalaki nga na knockout sa kinumo sa iyang 16-anyos nga manghod human kini masumbagi sa naulahi ang nabugtoan sa kinabuhi sa miaging gabii diha sa barangay Basak sa dakbayan sa Lapulapu.

Ang namatay (pangalan gitago aron taguon ang pagkatawo sa igsuong minor) nagtrabaho sa usa ka construction site ug nagpuyo sa nahisgutang dapit gikatahong nawad-an sa panimuot dihang naigo sa kinumo sa iyang manghod diha sa apapangig. Ang manghod daling gikostudiya sa mga barangay tanod human sa insidente.

Si SPO1 Allan Pantaleon sa Homicide Section sa kapolisan sa maong dakbayan nga nahinabi sa Banat News miingon nga nagsugod ang away sa managsuon dihang ang manghod gikatahong nagtubagtubag sa amahan dihang kini gimaymayan sulod sa ilang balay.

Ang biktima nga wala makauyon sa gihimo sa iyang manghod ngadto sa ilang amahan daling miduol ug mibadlong niini apan giingong imbes nga mopatuo nasuko hinuon kini ngadto sa maguwang, aron paglikay sa gubot mibiya ang maguwang apan giingong gisundan kini sa manghod.

Matud pa nga pwerteng sukoa sa manghod ngadto sa biktima ug dihang naabtan gisampit niya kini apan paglingi sa biktima nasugatan sa apapangig niini ang walop sa manghod.

Gituohang kusog kaayo ang pagkaigo sa kumo sa minor tungod kay natumba ang maguwang niini sa yuta ug nawad-an og panimuot.

Apan ang kapolisan nagtuong dili kinumo ang nakaigo sa biktima kay posibleng gipusposan kini og gahing butang diha sa ulo nga maoy nakaingon sa kamatayon niini. Gisuwayan pa unta pagdala ang biktima sa Lapulapu City District Hospital apan gideklarar kining patay na.

Ang suspetsado nga nadakpan sa mga barangay tanod gitugyan na ngadto sa kapolisan ug kasamtangan karong gibalhog sa sulod sa ilang detention cell.

Si Pantaleon miingon nga ilang gisugyot sa pamilya sa namatay nga ipaubos sa awtopsiya ang patay’ng lawas sa biktima pagsuta sa hinungdan gyud sa kamatayon niini. (BANAT NEWS)