Kapitan gikulata sa konsehal

CEBU, Philippines - Usa   ka kanhi kapitan sa barangay sa lungsod sa Barili mibutyag kagahapon nga pasakaan niya og kaso ang usa ka konsehal sa maong lungsod nga mikulata kaniya niadtong miaging hapon sulod mismo sa buhatan sa Barili Police Station.

 Si kanhi kapitan Vicente Bebot Villarin, 52 , s a barangay Veto, Barili , kinsa nagtrabaho isip kanhi   Job Order employee sa Barili mibutyag sa Banat News nga iya nang giandam ang kaso batok kang konsehal Rene Hector Gandionco sa maong lungsod.

Matud pa ni Villarin nga gikonsulta na niya sa iyang abogado nga si manlalaban Rodolfo Dacalos alang sa pormal nga kiha nga iyang isang-at ngadto sa korte batok kang Gandionco.

Giasoy ni Villarin nga hapit siya makuyapi dihang kalit lang mitugpa ang kumo ni Gandionco sa iyang tuong apapangig niadtong Sabado sa alas 3:00 sa hapon sulod sa Barili Police Station sa walay igong hinungdan.

Matud pa niya nga wala siya makabantay kay wala siya magdahom nga kulatahon siya ni Gandionco sa maong higayon.

Wala usab siya makabawos kay dali kaayong miuwang kanila ang kapolisan, hinungdan nga adto nalang siya manimawos sa korte.

Gisaysay ni Villarin nga sa wala pa siya kulataha ni Gandionco, nagkuyog silang duha ngadto sa police station kay gusto si Gandionco nga ipa-blotter niini nga dili tinuod ang pasangil nga siyay nagpadala og mga buwak sa patay alang kang Tito Marinyas, ang Human Resource Municipal Officer (HRMO) sa Barili.

Kini may labot sa estorya nga mikatap sa Barili nga si Gandionco kuno maoy nagpadala og buwak para sa minatay ngadto kang Tito Marinyas nga igsuon ni Mayor Teresito Marinyas sa maong lungsod.

Apan naunsa ba matud ni Villarin nga sa didto na sila sa sulod sa police station , wala   siya makabantay sa kalit nga pagsumbag kaniya ni Gandionco sa walay igong hinungdan.

Gumikan sa kakusog sa kumo ni Gandionco   napawong makadiyot ang iyang panan-aw ug hapit siya makuyapi    sumala ni Villarin.

Gumikan sa tambag sa kapolisan, gipa-blotter dayon    niya ang maong hitabo human mobiya pag-una si Gandionco kaniya.

Sa miaging buwan usa usab ka lending collector ang nga taga Toledo City ang nagpa- blotter usab sa kapolisan sa Barili human kuno kini ti-oni og kutsilyo ni Gandionco samtang naningil siya sa ilang mga suki nga nakautang kanila didto sa   merkado   publiko sa Barili. (/WC)  (BANATNEWS)