Tulisang de motor sa Consolacion tiklo

CEBU, Philippines - Usa ka gikatahapang tulisan nga de motor nadakpan sa kapolisan didto sa sitio Hill Top, barangay Nangka sa lungsod sa Consolacion sa miaging buntag.

Ang nadakpan mao si Ricky Villamor Andojar, 19, nga taga barangay Casili sa lungsod sa Consolacion.

Si SPO3 Renato Valle sa kapolisan sa Presinto 3 sa MCPO nga nagbase sa barangay Basak sa dakbayan sa Mandaue nga nahinabi sa Banat News miingon nga nadakpan ang maong suspetsado human tulisa niini si Marivic Plaza, 26 anyos nga nagpuyo sa maong dapit. Matud pa sa kapolisan nga ang biktima naglakaw sa karsada nga nagpunay og kulitog sa iyang cell phone.

Pagkakita sa mangtas nga suspetsado nga nag-text-text ang biktima gihunongan dayon kini ug  ang iyang backrider maoy milanit sa armas, mition niini ngadto sa biktima ug mideklarar nga tulis.

Human makuha ang cell phone mipabulhot kini sa pagpadagan sa ilang sakyanan ug walay nahimo ang biktima gawas sa pagpahibawo sa kapolisan.

Si SPO3 Valle miingon nga ang ilang hepe nga si Inspector Wilson Abot maoy mipatan-aw sa biktima sa ilang photo gallery sa mga banggiitang tulisang de motor ug didto nakita sa biktima si Andojar nga maoy backrider nga mition kaniya og armas ug mikuha sa iyang cellphone.

SPO2 Valle miingon nga giadto nila ni Inspector Abot ug mga kauban ang Phase II sa San Miguel Village sa barangay Jagobiao ug dihang nakita sila sa mga suspetsado mipadagan kini sa ilang motorsiklo busa nahitabo ang ginukdanay.

Apan si Andojar nga nag-backride   sa maong higayon miambak sa motor hinungdan nga ila kining nasikop.

Nasakmit sa kapolisan gikan sa maong suspetsado   ang cell phone sa biktima .38 kalibre nga revolver nga adunay lima ka buhing bala ug illegal nga drugas.   - BANAT NEWS