Misunog sa balay sa amo gikasohan

CEBU, Philippines - Gipasakaan na kagahapon ang katabang nga giingong maoy nagsunog sa balay sa pamilyang Falcon nga namatyan usab og laing katabang didto sa Holy Family Village 1, sa barangay Banilad, ning dakbayan sa Sugbo niadtong Pebrero 22, 2012.

Si Aubrey Soria, 22, dalaga nga taga Dumlog, dakbayan sa Talisay, mag-atubang sa kasong Qualified Arson samtang ang inahan niini nga si Minda Soria gipasakaan usab og kasong Obstruction of Justice.

Sa pakighinabi sa Banat News ni PO3 Ruth Violanggo gibutyag niini nga gilakip ang inahan ni Soria sa kaso tungod sa pagdala niini kang Soria ngadto sa lungsod sa Minglanilla imbis moawhag kini sa iyang anak sa pagpasurender ngadto sa kapolisan.

Si City Prosecutor Joseph Valcarillo mirekomendar nga walay piyansa ang salaod nga nahimo ni Soria sa tinuyo nga pagdaob niini sa balay ni Falcon.Kahinumdoman nga niadtong kaadlawon sa Pebrero 22 nautingkay ang pamilya ni Retired Col. Mariano Falcon Sr. sa dihang mikalit lang og ulbo ang sunog sa ilang balay hinungdan nga nangikyas sila sa pagsalbar sa ilang kinabuhi.

Apan ang ilang katabang nga si Cornelia Tagalog, wala makalikay sa maong sunog ug napaig kini.

Ang pamilyang Falcon nangita ni Soria niadtong tungora sa pagtuo nga nahilakip usab kini sa pagkasunog hangtod nga nasayran nga dako kining buhi kay mao diay miduslit ug midaob sa ilang balay.

Dali rang natultolan sa kapolisan ang balay ni Soria busa ila kining gisikop aron panubagan ang kaso nga iyang giatubang. (WC) (BANATNEWS)