Apartment ug balay sunog

CEBU, Philippines - Upat ka lawak sa six door apartment ug usa ka balay sa silingan ang naugdaw ug laing usa ka lawak sa apartment ang nakan-an sa kayo sa sunog nga miulbo didto sa F. Llamas, Tres Abril, barangay Punta Princesa, dakbayan sa Sugbo sa miaging gabii.

Ang maong apartment ug balay gipanag-iya sa pamilyang Hortellano ug Lim. Ang sunog gikatahong nagsugod sa alas 7:45 sa gabii niadtong Sabado ug nakontrolar tulo ka minutos gikan sa pag-alarma sa mga bombero.

Si Almejun “Ian” Bacalso, 22, silingan sa pamilyang Lim maoy unang nakabantay sa pag-ulbo sa kayo nga nagsugod sa kwarto nga giukopahan ni Frank Lim kinsa wala pa maabot niadtong higayona. Uban sa iyang duha ka mga higala si Bacalso misulod sa balay ni Lim aron unta mosuway pagpawong sa kayo apan wala na nila kini matabang.

Si Bacalso ug ang iyang mga higala milipot na lang sa likod sa balay ug mipahibawo kang Michael Lim bahin sa sunog.

Si Cebu City Fire Marshal Aderson Comar mibutyag nga mokabat sa P100 mil ang danyos sa maong sunog nga gipaubos sa second alarm. - Brenda D. Batuto ug Ryan Christopher J. Sorote sa The Freeman/WC (BANAT NEWS)