Simbahan sa pentecostal ugdaw

CEBU, Philippines - Mikabat sa P45 mil ang kantidad sa naugdaw nga simbahan sa Pentecostal ug kasikbit nga balay niini sa sunog nga miulbo didto sa sitio Olbuhan, barangay Bonbon, lungsod sa Aloguinsan kagahapon sa alas 3:50 sa kaadlawon.

Unang nasunog ang balay ni Elisa Casquijo, 50, ug naangin lang ang  simbahan sa Pentecostal, sumala pa ni PO1 Recelieto Quilaton sa Aloguinsan Police Station.

Matud pa ni Quilaton nga ang mga apo ni Casquijo nga mga batan-on   mao ray nahibilin sa iyang balay kay tua man siya sa Mindanao.

Gibutyag ni Quilaton sa Banat News nga nagtuo sila nga   may baga sa kayo sa abohan nga wala mapawong niana pang sayong kagabhion samtang nagluto og panihapon ang mga apo ni Casquijo kinsa wala lang hinganli sa kapolisan.

Midugang si Quilaton nga ang pundok sa kahoy nga igsusugnod sa silong sa maong balay maoy natagakan sa baga nga wala mapawong gikan sa abohan nga maoy sinugdanan sa miulbong sunog.

Hinuon sa pagkasunog sa balay didto matulog sa ilang silingan ang mga apo ni Casquijo busa naluwas kini sa maong katalagman apan gumikan kay mga gaan nga materyales ang dapat sa maong balay dali kaayo kining misilaob ug ang sikbit nga simbahan sa Pentecostal dali usab kaayong gikaon sa        kayo.

Padayon pang gisuta sa kabomberohan sa Aloguinsan ang maong hitabo. (/WC)   (BANATNEWS)