Simbahan sa Dumanjug gipaayo ni Gwen

CEBU, Philippines - Si Governor Gwendolyn Garcia misusi sa simbahan sa Dumanjug ug uban pang naapektohan sa linog didto sa lungsod sa Dumanjug human masayri ang sinkhole kon paghulpa sa yuta  didto sa barangay Camboang sa maong lungsod.

Nakadawat usab og taho ang gobernador nga naapektohan usab ang St. Francis of Assisi sa maong lungsod   sa linog nga miigo sa lalawigan sa nakalabay nga semana.

Nasuta sa gobernador nga natipak ang dakong bahin sa bubong niini tungod sa kakusog sa pagtay-og sa linog.

Ang gobernador miingon nga iyang naobserbahan ang kadako sa panginahanglan nga kini maayo dayon sa daling panahon kay naghatag kini og hulga sa katawhan nga manimba.

 Subay niini ang gobernadora mihimo dayon og lakang alang sa kasulbaranan sa maong problema pinaagi sa pagtugyan niini ngadto sa Provicnial Planning and Development Officer nga si Engr. Adolfo Quiroga.

Segun sa mando sa gobernador nga kinahanglang masugdan dayon ang pag-ayo sa nadaot nga bahin sa simbahan aron nga dili mapakgang ang kalihokan sa mga parokyano sa Dumanjug.  - BANAT NEWS