Polis nga nanglambos og blotter girelibohan

CEBU, Philippines - Pormal nang girelibohan ang pulis nga nadestino sa Boljoon Police Station nga gipasanginlang nanghapak og blotter sa ilang dinakpan niadtong miaging buwan.

Si Sr. Supt. Patrocinio Comendador, hepe sa kapulisan sa probinsya sa Sugbu nga nahinabi sa Banat News nagkanayon nga miisyu siya og kamanduan niadtong Lunes nga ibalhin sa Cebu Provincial Public Safety Company (CPPSC) si PO1 Ricky Pelonio gikan sa Boljoon Police Station.

Mipasabot si Comendador nga ang pagbalhin kang Pelonio gihimo aron dili kini makapanghasi sa reklamanteng si Luceno Amancio.

Si Amancio mipasangil kang Pelonio nga mihapak niya og blotter dihang siya gidakop sa maong pulis ug duha ka kauban niini ug gidala sa police station human siya pasanginling nanakop siya og langgam nga Punay ug Alimokon niadtong Enero 22 sa hapon didto sa sitio Camparang sa barangay El Pardo, Boljoon.

Gani gipasakaan sa kapulisan si Amancio og kasong Wild Conservation Protection Act sa R.A 9147 bisan sa panghimakak niini.

Matud niya nga iyaha usab tan-awon kun duna bay tulobagon ang hepe sa Boljoon. “Ang hepe if ni-tolerate gyud siya, aw atong tan-awon unsay iyang liability.”  - BANAT NEWS