734 aftershock ang natala sa Phivolcs

CEBU, Philippines - Molanat pa sa usa ka semana ngadto na sa usa ka bulan ang mga masinating aftershocks epekto sa pagtay-og sa kusog nga linog sa Central Visayas nga mitala og 6.9 magnitude gikan sa Tayasan, Negros Occidental niadtong Lunes.

 Matud ni Rolando Montañez, seismological observer sa Philippine Institute of Volcanology and Seismology (Phivolcs)-7 dihang nahinabi sa Banat News sukad kagahapon sa alas 6:30 sa buntag nakatala na sila og 734 ka mga aftershocks o ginagmay’ng pagtay-og.

Apan matud niya kadaghanan niini wala mabatyagi sa publiko tungod kay hinay ra kaayo sama sa intensity 1 ngadto na sa intensity 3. Base sa nangaging mga kusog nga mga linog molanat pa og usa ka semana ug duna pay kahigayunan nga moabot og usa ka bulan nga mabatyagan ang ginagmay’ng pagtay-og.

Gihulagway ni Montañez nga mao pa kini labing kusog nga linog nga niigo sa Sugbo nga managsusama ra og gikusgon sa linog niadtong 1995 diin ang epicenter didto sa Bohol ug intensity 5 gihapon ang gikusgon sa Sugbo.

Giklaro ni Montañez sa publiko nga wala pay modernong kahimanan nga makatagna kun duna pay laing linog nga motay-og sa Central Visayas karung tuiga human sa kusog nga linog adtong Lunes.

“Unpredictable gyud na kay wala pay bisan kinsang nasud nga nakatag-an kun kanus-a subling moigo ang linog ug kun pila ka linog ang mahimong moigo sa usa ka lugar,” dugang pasabot ni Montanez. Samtang gibutyag ni Florenda Gaviola sa Civil Defense Officer sa Office of the Civil Defense (OCD-7) dihang nahinabi sa Banat News way dakung kadaut nga nasinati ang Sugbo epekto sa maong linog.

Sukad kagahapon sa alas 8:00 sa buntag nga record bugtong report nga nadawat sa OCD-7 sa kadaut dinhi sa Sugbo mao pa lang ang na-crack nga mga school buildings sa Abellana National School (ANS) ug ang nangliki nga karaang building sa Saint Vincent Hospital sa Osmeña Boulevard.  - BANAT NEWS