Patay nadugta na

CEBU, Philippines - Baho ug nagsugod na og kadugta ang patay’ng lawas sa   usa ka “job order” (JO) nga trabahante sa kagamhanan sa dakbayan sa Talisay kinsa gituohang giatake sa altapresyon   sulod sa lawak sa kaugalingon niyang apartment sa barangay Tabunok, sa maong dakbayan.

Ang namatay mao si Gido Nacario Abellana (alyas Gido) 47, nagpuyo sa maong dapit ug JO sa Talisay City Hall.

Ang patay’ng lawas ni Gido giingong nanimaho na tungod kay nagsugod na sa pagkadugta dihang nadiskobrehan kini sa iyang igsoon niadtong Huwebes sa gabii. Sa imbestigasyon sa kapolisan nasayran nga si Gido kataposang nakit-an uban sa iyang mga higala niadtong Enero 30, 2012 ug sa milabay’ng tulo ka adlaw wala na kini mo-report sa iyang trabaho sa city hall.

Si Gido giingong nabantayan usab kining wala na mogawas sa iyang apartment nga gipuy-an ug wala na usab motubag sa tawag sa telepono sa iyang mga paryente. Gumikan niini si JR Abellana nga iyang igsoon mipugos pagsulod sa lawak ni Gido    nga nahimutang sa ikaduhang andana sa iyang apartment ug maoy nakita niini nga naghigda si Gido sa kama nga wala nay kinabuhi.

Gituohan nga si Gido giatake sa altapresyon ug walay nakatabang niini tungod kay nag-inusara kini sa iyang apartment.

Sa report usab nga nahipos sa kapolisan giingong kaniadto nakasinati na og atake sa high blood pressure si Abellana. WC - (BANAT NEWS)