Rice cooker maoy hinungdan sa sunog

CEBU, Philippines - Naugdaw sa hingpit ang usa ka balay samtang igo lang nakan-an sa kayo ang sikbit niini, sa usa ka sunog nga miulbo sa atubangang bahin sa merkado publiko sa Poblacion East, sa lungsod sa Moalboal kagahapon sa alas 11:00 sa buntag.

Ang balay nga naugdaw gipanag-iya ni Cirilo Buaya, 62, minyo ug dispatser sa Librando Bus Liner, samtang ang silingan niyang si Inocentis Tabanao, igo lang nakan-an sa kayo ang balay niini.

Si Fire Officer John Molina sa Moalboal Fire Station mibutyag sa Banat News nga nadawat nila ang alarma sa alas 10:50 sa buntag ug nakontrolar nila sa hingpit ang kayo nianang pagka-alas 11:03 o 13 minutos human sa maong alarma.

Sa gilusad nilang imbistigasyon nasayran sa mga bombero nga ang kayo nagsugod sa kusina ni Buaya nga gituhoang mugna   sa mi-overheat nga rice cooker.

Gibana-bana nga mikabat og P35 mil ang kantidad sa tanang kadaot   sa balay ni Buaya tungod kay mga gaan nga materyales ang mga dapat niini.

Way kinabuhing nakalas o kaha naangol atol sa maong sunog.  - BANAT NEWS