Dinakpan 'Gikulata' namatay

CEBU, Philippines - Namatay sulod sa tambalanan ang 28-anyos nga lalaki nga gidudahang nasobrahan og kulata human gidakop sa mga polis tungod sa giingong paghapak niini sa patrol car sa nagbantay sa gipahigayong bayle atol sa pista sa sitio Chinese barangay Poblacion lungsod sa Madredijos niadtong Domingo sa alas 2:45 sa kaadlawon.

Ang biktima nga giilang si Redentor Escalicas, 28, taga Poblacion sa maong lungsod namatay kagahapon alas 11:40 sa buntag diha sa Bantayan District Hospital sa lungsod sa Bantayan.

Matud ni Dr. Jatoborn Batanagol, ang resident doctor sa maong tambalanan nga nahinabi sa Banat News na-admit si Escalicas niadtong Domingo sa alas 1:00 sa hapon ug iyaha dayung gi-rekomendar nga ipadali og dala sa tambalanan dinhi sa dakbayan sa Sugbo tungod sa paggahi sa tiyan niini. Nagtuo siyang kinahanglang maoperahan ang maong pasyente tungod kay nagduda siyang adunay grabeng kadaot kining nahiaguman sa tiyan nga mao say nakaingon nga naglisod og ginhawa si Escalicas.

Sumala pa ni Batanagol nagpunay og ping-it si Escalicas tungod sa grabeng kasakit sa tiyan niini. Si kanhi Madredijos vice mayor Doroteo Salazar maoy mipahibawo sa DyDD diha sa programang “Tingog sa Lungsod” ni Engr. Greg Senining kabahin sa maong dinakpan sa mga polis nga namatay.

Si Rashel Escalicas, igsuon sa namatay mibutyag sa pakighinabi sa Banat News sa telepono nga pag-abot sa iyang igsuon sa ilang balay nagping-it na kini sa kasakit ug dihang gipangutana sa ilang inahan misumbong kining gisukmag kini sa mga polis ug ‘dili na niya maagwanta ang kasakit’ ug magpadala kini sa tambalanan.

Si SPO1 Wainright Desabelle ang desk officer sa maong lungsod dihang nahinabi sa Banat News mibutyag subay sa nakatala sa ilang blotter gidakop si Escalicas nila ni PO3 Fabio Daplinan, PO2 Mamirod Casisina ug uban pa tungod kay giingong gikalitan og hapak sa kamot ni Escalicas ang ilang patrol car. Ang maong mga polis maoy nagbalantay sa kalinaw sa gipahigayong bayle (disko) niadtong Domingo sa kaadlawon.

Dugang pa ni Desabelle base sa ikaduhang entry sa blotter sa kapulisan ilang gibuhian si Escalicas pagkaalas 9:15 sa buntag adtong Domingo ug gani mipirma pa kini sa blotter.

Si Sr. Insp. Jaime Santillan, ang hepe sa kapolisan sa maong lungsod dihang nakahinabi sa Banat News mibutyag nga aduna siyay himuong imbestigasyon batok sa iyang mga sakop nga nag-duty nianang mga orasa.

Sumala pa niya iyang atimanon ang reklamo sa pamilya sa namatay ilabi na nga ang igsuon niini nagdala og mga litrato sa mga bun-og nga nahiaguman sa igsuon gikan sa lawas, tiyan ug sa liog.

Kagahapon sa hapon gipatawag ni Santillan ang mga sakop nga nag-duty nianang mga orasa alang sa imbestigasyon. (EIM)  (BANATNEWS)