CEBU, Philippines - Gipadayag sa Department of Public Services nga Engr. Dionesio Gualiza nga iyaha unang i-verify ang isyu nga matud pa duna siya’y mga tawo nga giingong misulod og overpricing sa iyang departamento.
Nagkanayon si Gualiza nga wala siya nasayod sa maong mga pasangil apan mokooperar siya sa gihimong pakisusi aron matin-aw ang tanan.
Kahinumduman nga gipadayag ni Konsehal Richard Osmeña nga iyang naobserbahan nga dunay mga anomalya sa pagpalit og pipila ka spare parts sa mga sakyanan tungod kay ang uban gi-overpriced.
Sumala pa sa konsehal nga kinahanglan nga mahunong ang mga anomaliya nga giingong binuhatan sa pipila ka mga sakop sa DPS.
Si Osmeña mihimo og imbestigasyon niini hinungdan nga nakakuha siya og inisyal nga findings. Matud pa sa konsehal nga duna siya’y ubay-ubay nga mga dokumentong makatabang sa mga imbestigador.
Si Gualiza mihangop sa sentimiyento ni Osmeña tungod kay mas pahugtan niya karon ang pagpaniid sa iyang mga sakop.
Nagkanayon si Gualiza nga kung dunay tawo niya nga mapamatud-an nga nangwarta sa mga pagpamalit og piyesa sa mga sakyanan sa DPS ilaha kining pasakaan og kaso. - BANAT NEWS