Don Gil Garcia kaagian na

CEBU, Philippines - Nahibalik na sa karaang agianan ang mga sakyanan nga padung sa Guadalupe ug Banawa human tak-opi sugod kagahapon ang access road sa compound sa Kapitolyo.

Kini tungod kay ang trabaho sa pagpalapad sa dalan Don Gil Garcia nahuman na ug mahimong kaagian sa mga sakyanan nga magpaingon sa Guadalupe ug Banawa ang maong karsada.

Sa bahin sa nanarbaho sa Kapitolyo, dili na kaayo sila mahasol tungod kay wala nay mga sakyanang pribado ug pasaheroan nga magbadhas-badhas matag karon ug unya sulod sa compound sa Kapitolyo.

Si Gobernador Gwendolyn Garcia mibutyag nga   ang pagpasira sa access road sulod   sa compound sa Kapitolyo iyang gimando human mopahibawo ang mga tinugyanan sa City Traffic Operation and Management (CITOM) nga mahimong ibalik na sa karaang agianan ang mga sakyanan nga gikan sa dalan Escario nga moadto sa Banawa ug Guadalupe. (BANATNEWS)