2 ka ulitawo naghithit og marijuana tiklo

CEBU, Philippines - Duha ka ulitawo kinsa naaktohan sa kapolisan nga nagyupyop og marijuana didto sa bakanteng luna sa Sta. Lucia, sa barangay Poblacion Oriental, lungsod sa Consolacion gisikop sa kapolisan sa miaging buntag.

Ang mga suspetsado mao sila si Kiven Kert Cortes, 20 ug Fllyod Macahito, 21, pulos ulitawo ug taga barangay Nangka sa nahisgotang lungsod.

Si PO2 Jonaskie Romero sa kapolisan sa maong lungsod nga nahinabi sa Banat News   miingon nga nagpatrolya ang ilang mga kauban sa maong dapit dihang nasigpatan nila ang duha nga naghithit og marijuana.

Busa sila si PO1 Russel Rosa ug PO1 Francisco Baltazar daling mihunong ug gisita ang mga suspetsado kay nasuta nila nga marijuana ang gihithit niini tungod sa aso nga ilang napanimahoan. 

Matud pa ni PO2 Romero nga gawas sa usa ka linikit nga gipulipulihan og suyop sa duha, nakakuha pa sila og laing linikit sulod sa bulsa sa mga suspetsado nga wala pa kadagkuti.

Gidala dayon sa mga kapolisan ngadto sa ilang buhatan ang mga suspetsado ug gidiretso og balhug sa prisohan samtang giandam ang kiha nga isang-at ngadto sa korte ugma Lunes.

Kasong paglapas    sa Dangerous Drugs Law maoy ipasaka batok sa duha. (BANATNEWS)