Gitangkugo pagpusil patay

CEBU, Philippines - Patay ang usa ka estambay human kini gipusil sa iyang silingan pasado alas- 4 sa miaging hapon sa sitio Villagonzalo II barangay Tejero ning dakbayan.

Ang biktima nailhan nga si Pablo Omar, 29, molupyo sa maong lugar samtang ang gitumbok nga mamumuno una lang nailhan sa pangalan nga Elyong. Sa imbestigasyon sa kapolisan nasayran nga ang biktima nagduwa og hantak sa maong lugar uban ang pipila ka higala ug silingan dihang kalit nga miabot ang suspek ug gipusil ang luyong bahin sa ulo sa biktima.

Daling gidala sa Cebu City Medical Center ang biktima samtang ang mamumuno dali usab nga misibat human sa panghitabo apan giingong nakabsan kini sa kinabuhi paglabay sa pipila ka gutlo.

Sa pakighinabi sa The Freeman ang igsuong pamantalaan sa Banat News kang PO3 Geoffrey Gutual, sa Cebu City Police Office, Homicide Section nga sa gihimong followup operations nailhan nila ang suspek nga mao si Alfredo “Elyong” Gagoni Jr.

Sumala pang Gutual duna   nay karaang panagbangi ang duha human ang mga higala sa biktima mikulata sa barkada sa suspek. (Uban sa report ni Ryan Sorote sa The Freeman/EIM) (BANATNEWS)