Sakop sa Akrho gipatay

CEBU, Philippines - Patay nang nadangat sa tambalanan ang 20- anyos nga ulitawo nga sakop sa Alpha Kappa Rho fraternity human kini pusila sa tulo ka mga batan-on nga gituohang sakop sa karibal nga grupo samtang nag-estambay sa usa ka payag sa Greenhills Poblacion lungsod sa Liloan niadtong Miyerkules sa alas 5:30 sa hapon.

Ang biktima mao si Jade Lirasan, 20, nagpuyo ra sa maong lugar kinsa nakaangkon og mga samad pinusilan sa kalawasan dihang kalit gipaulanan og bala sa tulo ka batan-ong pulos nag-helmet ug nagtaptap sa ilang nawong sakay sa puwa nga motorsiklo.

Matud ni PO2 Gabriel Opoc sa Liloan Police nga usa sa miresponde sa alarma nag- text ang biktima dihang naabtan sa mga gikatahapan ug mihunong sa tungod sa biktima ug ang ikatulong angkas nanaog ug gidiretso pagpusil ang biktima tulo ka higayun.

Pagkahuman niini daling miikyas ang tulo pahilayo samtang gidala sa Eversely Hospital sa siyudad sa Mandaue si Lirasan apan gideklarar nga dead on arrival.

Tulo ka kabhang sa .9mm nga bala ug usa ka deformed slug nga gituohang gikan sa armas sa mamumuno ang napunitan sa lugar.

Gituohan sa kapulisan nga panimawos ang motibo sa krimen sanglit nakahipos sila og impormasyon nga ang biktima gipasanginlang nakapusil patay kaniadto og sakop sa karibal nga fraternity (BRP) sa milabay’ng Nobiyembre.

Ang kapulisan mipalawom pa karun sa ilang imbestigasyon ug gitutukan ang panagsungi sa magkaribal nga grupo sa maong kaso. (BANATNEWS)