Problemado naghikog

CEBU, Philippines - Patay nang napalgan sa iyang mga anak ang usa ka amahan nga nagpakamatay pinaagi sa paghikog tungod kay naguol kini nga nag-antos ang ilang pamilya sa tumang kalisod.

Ang nagpakamatay mao si Anthony Navarro Pastor, 37, usa ka construction worker ug nagpuyo diha sa sitio Lower Linao barangay Lipata lungsod sa Minglanilla niadtong Domingo sa alas 8:40 sa gabii.

Matud ni PO1 Sheila Pagatong sa Minglanilla Police Station dihang nahinabi sa Banat News si Pastor nakit-an sa iyang mga anak nga nagbitay na sulod sa ilang balay nga patay na dunay higot nga pisi sa liog. Gitug-an sa 16-anyos nga anak niini sa kapulisan nga dunay text message nga gibilin ang ilang amahan nga nagkanayon “kahibawo ko nasuko ka nako, wa koy ayo pagka amahan, kay wa ko ka atiman ninyo og tarong. Ayaw pasagdi ang inyong mama, maypa maghikog nalang ko,” sumala pa sa tipik sa text message.

Atol sa paghitabo walay laing kabanay si Pastor sa ilang balay. Matud pa sa kapolisan nga gibasol sa namatay ang kaugalingon nga wala kini makahatag sa panginahanglan sa iyang pamilya.   - BANAT NEWS