Puya bag-o pang gihilog gilabay

CEBU, Philippines - Usa ka puya nga bag-o pang nahabwa gikan sa sabakan sa wala hiilhing inahan gilabay kining patay na   sa baybayon sa sitio Looc, barangay Poblacion, lungsod sa Liloan sa miaging kaadlawon.

Si PO2 Rotchele Jugalbot sa Liloan Police Station nga nahinabi sa Banat News miingon nga ang maong puya ilang gibana-bana nga may pito ngadto sa walo ka bulan nga edad sulod sa taguangkan sa inahan.

Matud pa niya nga usa ka molupyo sa maong dapit nga nailhang si Fely Yuson maoy misumbong ngadto sa ilang buhatan kalabot sa puya nga diha sa baybayon nga giputos og panapton ug gibutang sa daplin sa lapyahan sa dagat.

Apan ang mihatag og kasayoran ngadto kang Yuson mao ang silingan niining si Marvin Noval, kinsa miangkon nga   maoy nakasindol sa maong puya, dihang naglakaw siya sa baybayon duol sa ilang balay.

Si PO2 Jugalbot midugang nga si Catherine Canete nga maoy municipal nurse on duty sa usa ka klinika sa lungsod ug maoy misusi sa maong puya nagtuo nga bag-o pa kining gihimugso gikan sa sabakan sa inahan ug gisalibay ngadto sa baybay.

Kini tungod sa nakita ni Cañete nga lab-as kaayong dugo sa agtang sa maong puya apan wala na kini pusod.

Gitugyan kini dayon sa kapolisan ngadto sa usa ka punerarya sa lungsod aron sa paglubong niini. (BANATNEWS)