Mga scholar di paduolon kang Young

CEBU, Philippines - Gipasidan-an ni Mayor Michael Rama ang mga scholar sa siyudad sa dili pagdangop ngadto sa buhatan ni Bise Mayor Joy Augustus Young gumikan kay wala kini koneksyon ug wala kini labot sa kasamtangang scholarship program.

Suma pa sa mayor nga ang tanang concern sa mga scholar anaa niya itugyan sa iyang education consultant nga si   Ester Cubero kansang buhatan niini anaa sa Department of Education (DepEd) nga nahimutang sa dalan Imus, ning dakbayan sa Sugbo

Gihimo sa mayor kining maong pasidaan tungod kay daghan gihapong mga scholar nga nasaag sa pag-adto sa buhatan ni Young bisan wala na kini katungod nga manginlabot sa mga kalihokan sa mga scholar sa kagamhanan sa siyudad.

Samtang subling gipatin-aw ni Rama ang isyu bahin sa P1,000 nga dugang allowance nga iyang gitanyag sa matag scholar diin may nagmahay kuno kay wala makadawat sa maong financial assistance.

Apan matud pa ni Cubero nga consultant ni Rama nga makadawat gyud niini   ang matag usa sa dul-ang 9,000 ka scholar sa siyudad kay may budget man nga gitagana alang kanila .

Nagkanayon si Cubero nga usa sa hinungdan nga wala pa matunol ang maong financial assistance ngadto sa ubang mga scholar kini tungod kay wala pa makahimo ang ubang tunghaan sa billing alang sa maong mga   estudyante busa   maglisod usab sila sa pagbuhat og   payroll alang niini.

Ang financial assistance unang gipang-apod apod didto sa Cebu Normal University apan niining higayona, adto na makuha sa Treasurer’s Office.

Ang siyudad mipatungha og mga tinun-an nga gradwado sa pampublikong tunghaan diin matag semester makadawat og tag P10,000 nga coupon ang matag usa kanila aron ipuno sa ilang tuition fee.(/WC) (BANAT NEWS)